It-team tal-'Guidance and Counselling' ta' l-MCAST jaħdem sabiex imexxi u joffri l-aħjar servizz possibli kemm għal studenti prospettivi u l-ġenituri tagħhom, kif ukoll għall-istudenti li diġa qed isegwu korsijiet fid-disa' istituti tal-MCAST.

Id-dmirijiet tat-Tim tal-'Guidance' u 'Counselling' jistgħu jinqasmu fi tliet oqsma prinċipali:

• 'Guidance' u 'Counselling' Vokazzjonali
• 'Counselling' Personali
• Attivitajiet fi Gruppi

'Guidance' u 'Counselling' Vokazzjonali

Dan l-aħħar stajna naraw żieda sostanzjli fl-opportunitajiet edukattivi, fis-setturi u fil-livelli kollha. Xogħlijiet tradizzjonali u s-settur tal-manifattura qed jonqsu waqt li opportunitajiet interprenali fis-settur tas-servizzi industrjali qegħdin jiffjorixxu. Dawn it-tibdiliet kollha qegħdin jaffettwaw liż-żgħażagħ fl-għażla tal-karriera tagħhom.

F'kulleġġ bħall-MCAST fejn l-istudenti qed jiġu mħarrġa fil-karriera ta' l-għażla tagħhom, 'Guidance' vokazzjonali huwa ta' mportanza kbira. Jekk studenti jkunu ħadu deċiżjoni wara li-ġabru l-informazzjoni neċessarja u jkunu ċerti mill-għażla li għamlu, jew sabu diffikultajiet waqt il-kors tagħhom, dawn għandhom bżonn ikunu jafu dwar triqat oħra li jistgħu jagħżlu.

Il-'Counsellors' tal-MCAST jgħinu lill-istudenti tul dan il-proċess ta' żvilupp personali, billi jagħtu appuntamenti lill-individwi kkonċernati biex jgħinuhom jagħrfu triqat alternattivi u jiddeċiedu fuq l-aħjar triq għalihom biex jaslu għall-iskop tagħhom.

Studenti li m'humiex sodisfatti bl-għażla tal-kors tagħhom fl-MCAST jew f'xi istituzzjoni oħra post-sekondarja jew terzjarja, ikollhom bżonn jiċċaraw il-ħolm u l-aspirazzjonijiet tagħhom. Il-'Counsellors' tal-MCAST flimkien ma' dawn l-istudenti jiddiskutu korsijiet oħrajn li huma jkunu jistgħu jagħżlu kemm fl-MCAST kif ukoll f'istituzzjonijiet oħra.

Dawk l-adulti li qed jaħsbuha biex ikomplu l-istudji tagħhom jew qed ifittxu karrieri oħrajn jistgħu wkoll jagħmlu użu minn dawn is-servizzi tal-'Guidance' u l-'Counselling'.

'Counselling' Personali

Il-'Counselling' jista' jintuża bħala għodda biex l-istudenti jieħdu aktar mill-ħajja. Il-'Counselling' Personali fl-MCAST huwa l-aktar iffukat fuq il-futur u l-iżvilupp personali, bl-għan li jagħti direzzjoni fil-ħajja, u fuq il-kapaċita' li l-istudenti jistgħu joħolqu d-destin tagħhom infushom.

L-istudenti jiġu nkoraġġiti biex ifittxu l-għajnuna u jagħmlu użu tajjeb minn dan is-servizz. F'ċerti sfidi li jiltaqgħu magħhom fil-ħajja, is-support, l-inkoraġġiment u li jsibu min jismagħhom, jista' jgħinom jifhmu aħjar lilhom infushom.

Il-'Counselling' huwa effettiv meta studenti, permezz ta' bdil ta' ideat u esperjenzi mal-'Counsellor', isiru aktar kapaċi jiffaċjaw sitwazzjonijiet li joffru sfida, u jagħmlu użu mir-riżorsi u l-opportunitajiet li jiltaqgħu maghħom fil-ħajja.

Dan il-proċess jinkludi :

• Identifikazzjoni, esplorazzjoni u ċarezza ta' sitwazzjonijiet li joffru sfidi u opportunitajiet li għadhom ma ġewx sfuttati.
• Għajnuna lill-istudenti biex jiżviluppaw u joħolqu l-għanijiet, l-oġġettivi jew aġendi tagħhom ibbażati fuq azzjoni, jifhmu s-sitwazzjonijiet ta' diffikulta' u jistabbilixxu prijoritajiet.
• Għajnuna lill-istudenti biex jiżviluppaw strateġiji ta' azzjoni biex jintlaħqu l-miri tagħhom u jieħdu l-opportunitajiet li jagħmlu differenza f'ħajjithom.
• Għajnunua lill-istudenti sabiex jaġixxu fuq dak li tgħallmu kemm qabel kif ukoll waqt is-sezzjoni tal-'Counselling'.

Attivitajiet fi Gruppi

Il-'Counsellors' jieħdu ħsieb kemm bżonnijiet individwali tal-istudent kif ukoll il-bżonnijiet ta' gruppi jew klassijiet. Fil-klassijiet kollha u fil-'workshops' b'mod speċjali, huwa mportanti li l-istudenti jgħinu lil xulxin u jaħdmu flimkien bħala tim. Dan ix-xogħol f'tim iwassal għal riżultati aħjar kemm fuq bażi ndividwali kif ukoll ta' klassi.

Din l-esperjenza ta' xogħol f'tim tipprepara lill-istudenti jadattaw irwieħhom biex jaħdmu flimkien mal-kollegi tagħhom meta, fil-futur huma stess ikunu jistgħu jpoġġu fil-prattika dak li qed jaspiraw għalih fil-karrieri li jkunu għażlu.

Il-'Counsellors' joffru dawn s-servizzi is-sena kollha biex jinkoraġġixxu lill-istudenti fil-kors tagħhom sakemm finalment jilħqu l-għanijiet mixtieqa.

Għal-appuntament mall-'Counsellors' ċempel fuq 23987133 or 23987134 jew ibgħat ittra elettronika lil counsellors@mcast.edu.mt