L-Isport fiċ-ċentru tal-MCAST f'Għawdex

Id-Dipartiment ta' l-isport fiċ-ċentru ta' l-MCAST f'Għawdex, għal matul is-sena akkademika l-ġdida ħejja diversi attivitajiet sportivi. Minbarra l-organizzazzjoni ta' logħob kompetittiv fil-forma ta' lig, se jkun organizzat ukoll logħob ma' skejjel oħra.

L-istudenti se jingħataw l-opportunita' li jipprovaw dixxiplini sportivi ġodda, fosthom dixxiplini sportivi li jintlagħbu fl-apert. Se jkollhom wkoll l-opportunita’ li jattendu għal sessjonijiet ta’ ħajra u wirjiet, kif ukoll taħditiet dwar sports u problemi relatati mas-saħħa. L-istudenti se jkunu jistgħu jmorru Malta biex jilagħbu kontra timijiet oħra tal-MCAST.

Fl-attivitajiet li jorganizza, id-Dipartiment jagħmel ħiltu biex jinħoloq ambjent amikevoli billi jippromwovi sens sportiv f'dak kollu li jorganizza. L-għan aħħari huwa li jimmotiva u jinkuraġġixxi lill-istudenti biex jieħdu sehem fl-attivitajiet sportivi u b’hekk jkollhom stil ta’ ħajja aktar san u attiv. Id-Dipartiment għandu wkoll l-għan li jtejjeb il-kultura sportiva fost l-Għawdxin.

Servizz ta' Appoġġ għall-istudenti fiċ-ċentru ta' Għawdex

L-għan ta' dawn is-servizzi huwa li l-opportunitajiet edukattivi u sportivi jitpoġġew għad-dispożizzjoni ta' l-ikbar għadd possibbli ta' studenti, f'ambjent san ta' appoġġ effettiv.

Servizzi ta' informazzjoni

Għal kull informazzjoni dwar il-korsijiet li se jsiru fiċ-ċentru ta' Għawdex, ċempel 21 556275, fejn hemmhekk issib għad-dispożizzjoni tiegħek nies lesti biex jagħtuk l-informazzjoni kollha li trid taf dwar:-

• Kif u meta għandek tapplika għall-korsijiet
• Għajnuna biex tiddeċiedi tajjeb dwar l-aħjar għażla tal-kors li tixtieq issegwi
• Pariri dwar x'għajnuna oħra jista' jkollok bżonn fl-istudji tiegħek

Informazzjoni dwar il-korsijiet kollha ta' l-MCAST tinkiseb miċ-ċentru Prinċipali ta' Informazzjoni li jinsab fil-Kampus Ewlieni, Telgħa ta' Kordin, Raħal ġdid, Malta, telefon 21 806440 jew 23987117 jew e-mail liċ-ċentru fuq information@mcast.edu.mt.

Servizz ta' Guidance u Counselling

Jekk għadek ma ddeċidejtx jew għadek m'intix ċert liema kors tixtieq tagħżel, tista' tiddiskuti din l-għażla ma' counsellor. Dan jgħinek tasal għal għażla informata dwar liema kors l-iżjed ikun jgħodd għalik. Dan is-servizz jingħata permezz ta' appuntament li jrid isir fiċ-ċentru tal-MCAST f'Għawdex, telefon 21 556275.

Diżabilita' u Diffikultajiet fit-Tagħlim

Studenti li għandhom xi diżabilita' jew xi ħtiġijiet speċjali fit-tagħlim, u li qed jikkonsidraw li japplikaw għal xi kors f' l-MCAST, għandhom jagħmlu appuntament mat-Taqsima ta' l-Edukazzjoni Inklussiva qabel ma japplikaw għal xi kors.

L-applikanti noffrulhom intervista kunfidenzjali biex niskopru l-bżonnijiet individwali tagħhom u b'hekk niddeterminaw x'livell u x'tip ta' appoġġ il-Kulleġġ jista' jagħti biex l-applikanti jkunu jistgħu jsegwu l-kors ta' l-għażla tagħhom.

Ċempel liċ-ċentru ta' l-MCAST f'Għawdex, telefon 21 556275 biex tagħmel appuntament.

Għajnuna fil-ħiliet Bażiċi

Studenti li m'għandhomx kwalifiki formali jew li m'għandhomx il-livell meħtieġ fil-Malti, fl-Ingliż u fil-Matematika, biex ikunu jistgħu jirnexxu fil-kors li jagħżlu, qed jingħataw għajnuna bħala sapport addizzjonali fil-ħiliet tagħhom. Dan is-sapport jingħata permezz ta' programmi speċjali fejn għalliema ta' esperjenza jħejju profajl ta' l-istudent wara li jsirlu screening test. L-għalliem iżomm rekord tal-progress tul il-programm kollu.

Għal kull diffikulta' dwar il-korsijiet offruti fiċ-ċentru ta' Għawdex jew xi Istitut ta' l-MCAST f'Malta, ċempel liċ-ċentru ta' l-MCAST f'Għawdex, telefon 21 556275 jew liċ-ċentru ta' l-Informazzjoni fil-Kampus Prinċipali, Telgħa ta' Kordin, Raħal Ġdid, Malta, telefon 21 806440.